எந்திரன்

சில ஹாலிவுட்  பெரிய பட்ஜெட் படங்களை பார்க்கும் போது தமிழில் இம்மாதிரி படங்கள் வராதா என்று ஏங்க வைக்கும், அந்த  ஏக்கத்தை போக்க வந்திருக்கும் படம் தான் எந்திரன். தமிழ் கூறும் நல்லூலகம் எல்லாவிடத்திலேயும் ரேடியோ, டிவி, மக்கள் என்று பெரும் எதிர்பார்பை ஏற்படுத்தியுள்ள படம்

படத்தின் கதை என்ன என்பதை உலகறியும். இருந்தாலும் ஒரு சின்ன அறிமுகம் வசிகரன் என்கிற விஞ்ஞானி மனிதனைப் போலவே ஒரு ரோபோட்டை உருவாக்குகிறார். அது ரோபோவாக இருக்கும் வரை பிரச்சனையில்லை.. ஆனால் அதற்கு ஆர்டிபீசியல் இண்டெலிஜெண்டின் மூலம் மனித உணர்வுகளை கொடுத்து சிந்திக்க ஆரம்பித்ததும் வரக் கூடிய ப்ரச்சனைதான் கதை. கடைசியில் நீதி சொல்லி முடிக்கிறார்கள்.

படம் முழுவதும் ரஜினி, ரஜினி, ரஜினி.. என்று ஒரே ரஜினி மயம்தான். வழக்கமாய் இம்மாதிரியான பெரிய பட்ஜெட் படங்களில் நிறைய கேரக்டர்கள வலம் வரும். இதில் பார்த்தால் மொத்தமே மொத்தம் நான்கு  கேரக்டர்களில் படத்தின் திரைக்கதை ஓடுகிறது. ரஜினி, ஐஸ், ரோபோ ரஜினி, வில்லன். இவ்வளவுதான். வசீகரன் ரஜினியிடம் தெரிகிற முதிர்வு, சிட்டி ரோபோவை பார்க்கும் போது தெரியவில்லை..  அவ்வளவு சுறுசுறுப்பு.. அந்த வாய்ஸ் மாடுலேஷன், பாடி லேங்குவேஜ், டான்ஸ் ஆடும் ஸ்டைல், ரஜினியிடம் உள்ள பெரிய ப்ளஸ் பாயிண்ட் அவருடய சின்ன கண்கள். அதிலும் ஷார்ப்பாக முறைக்கும் காட்சிகளில் குத்தும். ஆனால் சிட்டி ரஜினி கண்களில் ஒரு கூலிங் கிளாஸை மாட்டியிருந்தாலும் அந்த லுக்கும், ஸ்டைலும் ஷார்ப்.
ஐஸ் வழக்கம் போல. க்யூட் ஆண்டியாகிவருகிறார். ஐஸ்ஸுடன் ரஜினி நடிக்கும் போது அவர் கண்கள் பள..பள.. ஆனால் அந்த பள பள வில்லன் ரோபோ ரஜினிக்கு வரும் போது அதன் வெளிப்பாடு இருக்கிறதே.. அட்டகாசம்.  இவ்வளவு பெரிய விஞ்ஞானியின் அஸிஸ்டெண்ட்டுகள் இப்படி பிக்கிலித் தனமாய் இருப்பார்களா? என்ற கேள்வி இருக்கத்தான் செய்கிறது. அதுவும் படத்தின் மொதல் காட்சியிலேயே அவர்களின் மொக்கைத்தனம் வெளிப்பட்டுவிடுவதால் படத்தின் காமெடியை கொடுக்க வேண்டியவர்களே காமெடி பீஸாகி போனதில் வருத்தம்தான்.

ரத்னவேலுவின் ஓளிப்பதிவு அருமை என்பது சூரியனுக்கே டார்ச் வகை. முக்கியமாய் அந்த காதல் அணுக்கள் லொக்கேஷனும், பாடலும் சூப்பர். ரசூல் பூக்குட்டி, முதல் இந்திய, உலகின் சிறந்த டெக்னீஷியன்கள் பங்கேற்று சிறப்பு புரிந்திருக்கின்றார்கள். இப்படத்தின் கிராபிக்ஸ் கிரியேட்டர் ஷங்கர்.

எல்லோரும் ஒரே கதையை ஒவ்வொரு மாதிரி சொல்வார்கள். கதையை சொல்லும் முறை என்பது அவரவர்கள் கை ரேகை மாதிரி. அது போலத்தான் ஷங்கர் இக்கதையை சொன்னதும். ஆரம்பித்த முதல் காட்சியிலேயே கதை சொல்ல ஆரம்பிக்கிறார். பத்தாவது நிமிடத்தில் படம் எதை நோக்கி போகிறது என்று தெளிவாக்கிவிடுகிறார். பிறகென்ன. வெரி ஸ்மூத் ரைட்..தான் அதிலும் முதல் பாதியில் எந்திரனை நிறுபிப்பதற்காக வசீகரனும் செய்யும் முயற்சியும், சிட்டி அதில் தோல்வியடைவதும்.. அதற்காக ஷங்கர் அமைத்திருக்கும் காட்சிகள் சிம்ப்ளி சூப்பர்ப்.. ஏனென்றால் மிகவும் டெக்னிகலான ஒரு சப்ஜெக்டில் இம்மாதிரியான இயல்பான, டவுன் டு எர்த காட்சிகள், கொஞச்ம் ட்ராமாவாக, ஷங்கரின் க்ளிஷே காட்சிகளாய் இருந்தாலும் அது தான் வெற்றி பார்முலா. முக்கியமாய், அந்த தீ விபத்து காட்சியின் முடிவும். அந்த பிரசவக் காட்சியும். மொத்த தியேட்டரும் கை தட்டுகிறது.  ஆனால் பாவம் ஷங்கரின் அடுத்த படமான 3 இடியட்ஸ் படத்தின் முக்கிய காட்சியே இது தான் எனும் போது அந்த படத்திற்கு என்ன செய்யப் போகிறார் என்று யோசிக்க வைக்கிறது.
முதல் பாதி முழுவதும் அவ்வளவு ஸ்மூத்தாக போகும் திரைக்கதை. ரெண்டாவது பாதியில் ஐஸ், ரோபோ, காதலுக்கு பின் கொஞ்சம் அலைபாய்வது என்னவோ நிஜம் தான். ஆனால் கடைசி இருபது நிமிடங்கள் விறுவிறு, மொறு மொறு  கரம் மசாலா பாப்கார்ன் தான். படத்திற்கு வசனம சுஜாதா, ஷங்கர், கார்க்கி என்று போட்டாலும், முதல் பாதியின் திரைக்கதையிலிருந்து, வசனங்கள் முதல் எங்கு பார்த்தாலும் சுஜாதா. .சுஜாதா.. சுஜாதா.. படம் நெடுக அவருடய நாவல்களில் கொடுக்கும் தகவல்களை போல மிக இயல்பாக அறிவிக்காத தொனியில் இன்பர்மேஷன்கள் அள்ளிவிடப்படுகிறதும், ஆங்காங்கே வரும் ஷார்ப்பான கட் டைலாக்குகளும்.. ம்ஹும் வாத்யாரே.. இல்லாம போயிட்டியே..நீ.

ரஹ்மானின் இசையில் பாடல்கள் பற்றி பலவிதமான கருத்துக்கள் இருந்தாலும், மெல்ல மெல்ல ஏறும் விஷமாய் கேட்க, கேட்க, இனித்தது, இப்போது பார்க்க, கிடைக்க.. இன்னும் நன்றாகவேயிருக்கிறது. பின்னணி இசையில் அதிரடித்திருக்கிறார்.

படத்தின் க்ராபிக்ஸ், அனிமேட்ரானிக்ஸ், அது இது என்று ஏகப்பட்ட டெக்னிக்கல் விஷயங்கள் மேலோங்கி நம்மை கட்டிப் போட்டிருந்தாலும். இன்னும் கொஞ்சம் மெனக்கெட்டிருக்கலாமோ என்று யோசிக்க வைக்கும் இரண்டாவது பாதி.. முக்கியமாய் ரோபோ ரஜினிக்கு ஐஸ்ஸின் மீது ஏற்படும் காதல் ஓகே. அதுவே அப்ஷஷனாக மாறி ஆக்கிரமிக்கும் போது, டாமினண்டாக இருக்கும் ரோபோவின் கேரக்டரைசேஷனுக்கு இன்னும் கொஞ்ச்ம் எத்திகல் ஃபீலீங்கோடு கொடுத்திருக்கலாம் என்று தோன்றுகிறது. படத்தை பற்றி பரபரப்பு, சன் டிவி, விளம்பரம், 150 கோடி செலவு என்பதையெல்லாம் கேட்டுக் கொண்டிருப்பதை விட, படத்தை பற்றி படிப்பதை விட ஒரு நடை உங்க வீட்டு பக்கத்து குட்டி தியேட்டரில் கூட எந்திரன் ஓடும் ஒரு நடை போய்விட்டு வந்து சொல்லுங்கள். நிச்சயம் உங்க குழந்தைகளை கூட்டி செல்லுங்கள்.. கடைசி இருபது நிமிட க்ராபிக்ஸ் அட்டகாசங்களுக்காக..

எந்திரன் – A Film To Watch

கேபிள் சங்கர்